農曆新年,報章總愛找名人訪問,談談兔年願景。生果報找來周潤發談兔年願望,當中談及對社會、民生議題,較一眾高官,更貼近民情民意:

「雖然發哥早已殺入荷李活及內地市場,日日賺美金數人仔,但發哥十分關注香港民生,他說:「新年願望係政府可以多啲關注民生,家香港百物騰貴,樣樣都加得好厲害,我老婆去街市買菜,佢話買斤菜要成 30蚊,一隻新鮮雞要成 200蚊,柴米油鹽都貴晒,通脹高成咁,試問一般百姓點生活。」

香港樓價屢創新高,發哥忍不住批評政府說:「個樓市升成咁,叫啲打工仔點買得起樓呢?最慘係班中產,稅交得多,政府乜都幫唔到佢哋,公屋、居屋又冇資格申請,私人樓又買唔起,仲要整啲九招十三式出嚟,炒家唔係點殺到,殺死嘅係真係要買樓自住嘅用家,我家睇唔到九招十三式出台後可以壓制到樓市繼續升。」

發哥續說:「樓價高成咁主要係政府唔肯復建公屋同居屋,我唔知曾特首仲等乜,佢仲有兩年任期都滿啦,點解唔喺離任前,真正幫市民做啲好事出嚟,政府唔係應該以民為本,冇理由只係照顧地產商利益,咁搞法只會令到社會仇富情緒越嚟越嚴重。」

香港 80、 90後的年輕人何去何從,這是社會關注的問題,發哥認為政府應該有長遠打算,他說:「政府都要睇吓點幫佢哋,做長遠計劃,去解決年輕人讀完書出嚟後嘅就業問題,唔好等到佢哋畢業出嚟覺得好似前路茫茫咁,政府真係要正視吓,唔好只係一味只製造服務性行業嘅職位畀佢哋,因為佢哋都唔係全部都適合做服務性行業。」」

發哥對80後問題看法,不單較唐英年的「車毁人亡」論,更了解80後年青人面對的問題,就算討論通脹對市民的影響,唐英年昨日發表的新年賀詞,只說明白市民憂慮通脹、樓價上升等問題,也知道打工仔亦擔心人工加幅追不上通脹,但未有提出具體解決方法,只說會確保內地食物等供應穩定,又提醒市民,新一年要更加精打細算。

比較發哥和唐英年,起碼,發哥也知道「買斤菜要成 30蚊,一隻新鮮雞要成 200蚊,柴米油鹽都貴晒,通脹高成咁,試問一般百姓點生活」,較唐英年更了解民間困苦,究竟,單以了解民情而論,發哥是否較唐英年,更適合做特首?

廣告