You are currently browsing the daily archive for 10 八月, 2007.


「一個蝴蝶在巴西輕拍翅膀,可以導致一個月後德克薩斯州的一場龍捲風。」這是著名的蝴蝶效應(Butterfly Effect) ,其實是近年流行的混沌理論( Chaos Theory) 簡化演譯,想不到馬力去世,同樣出現蝴蝶效應,令到民主派無端引起一場不大不小的內部風波,而且頗有殺傷力。

最先是A(某民主派中人)來電 :「喂,聽講白鴿地區支部好唔妥,阿某某同某某,重有呀某某反枱喎,唔妥班大佬撐呀姨姨喎!係咪真架?」我:「係掛!重有呀某某同某某添!你聽唔到咩?」A:「係呀!我都聽到呀!堅唔堅呀!咁點收科呀?」我:「挑,點收科關我乜事!你重有冇多啲料呀?」A:「咁我又冇喎!你知我同佢地唔熟,唔係駛鬼打畀你收料咩?」我:「即係冇料啦!收線!」

然後是B(另一民主派中大佬級人馬):「唔係嘛,搞成咁?我地唔係一定贏硬噃!若某某同某某出,再加埋姨姨,一定輸喎!咪益咗葉劉!」我:「係呀!咁你地搞唔搞得掂某某同某某先?」B:「大局為重呀!民主派應該只係出一個人!」我:「咁即係你搞唔搞得掂佢地?」B:「咁唔得噃!輸咗好傷喎,一定要只派一個人出嚟選,你知喇…….(我:咁即係傾唔傾得掂先?)唔係呢,你聽我講喇……..」最後,他當然沒有答我喇!

再然後是C(民主派中某智囊) :「今日撞見幾個街坊,佢地搏命叫我地唔好搵姨姨出嚟選,明明幾年前姨姨好有人緣,為乜搞成咁?」我:「喂,你都唔知,我點知呀!咁你撐唔撐佢先?」C:「我地自身難保、冇人冇物點撐呀!」我:「挑!廢話!」

再再然後是D(又是民主派):「乖喇,我地好難做,我地手掌又係肉、手背又係肉,唔好搞喇!我地個頭就嚟大過個斗啦」 我:「咁咪好得意!我又想睇吓喎!」D:「唔好玩喇!乖喇!」我:「唔係喎!咁個局又好似好好玩噃!」

E(左派中人) :「聽講對家好亂喎!」我:「係掛!咁阿譚sir係咪做主席?定係XXX做?」E:「XXX?佢憑乜呀?我情願譚sir做!」我:「你咁講,我又好想阿XXX做喎!」

跟著是F(官府中人):「依家係咪因為個補選,搞到出面天下大亂?」我:「係呀!你地點睇?」F:「點睇?關我地乜事呀?我當睇戲!講時講,今次補選死邊個啫?」我:「超!做乜要話畀你聽呀!」

1961年 美國氣象學家勞倫兹,為了加快核證電腦推算氣象結果,以人手將電腦數據再輸入一次,滿以為結果一樣,怎知卻弄出一個完全不同的結果,事後他發現,電腦結果以數據小數後六位推算,他以人手輸入刻證時,卻只用了小數點後三個位,就是那微不是道的小數點後三個位的分別,卻弄出了完全不同的結果,從而觸發他的混沌理論:只要些微改變,也足以影響全局的發展!出現不同的結果!沒有人想到,馬力去世,會影響民主派吧!

若然有人在今次補選中,再加上一些微不足道變數,結果又會否因比而改變?

遊戲,真的太好玩,令我忘記一些令我極端 不開心的事!(又或許是「人類電腦化補完計劃」接近完成的成效!)


前晚,聽了一個我重視的人訴說他的故事,縱使很多人不認同他在故事中的寬容與自傷,我無意加入那些人的行列,或許,他走過的路,數年前我也走過,他嘗過的,我也嘗過,縱使我們以不同方法去處理自己的感受,可是大家有一個共通點,就是我們處理方法,除了自己之外,沒有其他人會認同。

昨夜,某人來電,先問一些他想知的人和事,然後又再訴說著一些我不想再聽、再知的她和她的一些事。那非某人的錯,前塵往事,他完全不知情,還估計我會有興趣知道她的近況,縱使語氣近乎不禮貌,我還是打斷了他的說話,匆匆掛上電話,工作未完成,總不能為此影響工作,集中精神,抽掉煙包中十數根香煙,冷靜情緒,又再投入工作…….

回到家中,大口呷著令人難以入口的紅酒,令自己明白,人生如酒,有令你難以忘懷的佳釀,同樣有令你無法下嚥的劣品,現實就是如此,你不可能一生也盡享好酒,有些時候,劣酒,令你更真實知道自己活著;痛楚,是提醒自己仍然生存。背負過去而生活,或許是沉重、痛苦,可是只要是自己的選擇的路,傍人如何看,那又與他們何干!只要我知道,我正在做甚麼,一切,已經足夠。

我不是天使,我不會選擇寬容,我情願做一個由地獄深處,帶著仇恨爬回人間的惡鬼,因為我不想再一次掉下地獄,只有永遠不忘記地獄的恐怖,才會令自己永不再掉下地獄,縱使沒有多少人認同,那卻是我現今唯一生存之道。

八月 2007
 12345
6789101112
13141516171819
20212223242526
2728293031  

Blog Stats

  • 1,845,661 hits

文章存檔

Enter your email address to subscribe to this blog and receive notifications of new posts by email.

加入其他 175 位關注者

頁面